Asnjë qeveri në botë nuk është vërtet e përgatitur për ndryshimet që Inteligjenca Artificiale do të sjellë në shoqëri. Paralajmërimi vjen nga bashkëthemeluesi i Microsoft, Bill Gates, i cili në një intervistë për Reuters u shpreh se qeveritë kanë mbetur shumë prapa përballë zhvillimit të shpejtë të kësaj teknologjie.
Gates, i cili prej vitesh ka qenë një nga zërat më optimistë për potencialin e IA-së, tashmë po ngre shqetësime më të forta për ndikimin e saj në tregun e punës, rrezikun e sulmeve të mundshme dhe varësinë që mund të krijohet nga “shoqëruesit” dixhitalë të Inteligjencës Artificiale.
“Nuk mendoj se ndonjë qeveri po merret me këtë në masën që duhet të merret”, deklaroi Gates, duke theksuar se institucionet shtetërore kanë mbetur shumë prapa.
Megjithatë, ai nënvizoi se Inteligjenca Artificiale ka një potencial të jashtëzakonshëm për të ndihmuar njerëzit më të varfër në botë, nëse përdoret në mënyrën e duhur dhe nëse sigurohet një akses sa më i barabartë.
Gates: Kam diskutuar me liderët botërorë
Gates tha se shqetësimet e tij rreth zhvillimit të IA-së i ka diskutuar me liderë botërorë, përfshirë presidentin amerikan Donald Trump dhe ekipin e tij. Ai bëri të ditur gjithashtu se po përpiqet të takohet me presidentin kinez Xi Jinping më vonë gjatë këtij viti.
Sipas Gates, sfidat që sjell Inteligjenca Artificiale kërkojnë bashkëpunim ndërkombëtar, pasi asnjë shtet nuk mund t’i përballojë i vetëm pasojat e mundshme të zhvillimit të kësaj teknologjie.
Potenciali i IA-së në shëndetësi
Pavarësisht paralajmërimeve, Gates dhe fondacioni i tij besojnë se Inteligjenca Artificiale mund të ndihmojë në ngushtimin e hendekut mes vendeve të pasura dhe atyre të varfra, në vend që ta thellojë atë.
Fondacioni Gates ka njoftuar se planifikon të investojë të paktën 1 miliard dollarë gjatë dy viteve të ardhshme për të zgjeruar aksesin në Inteligjencën Artificiale. Programi është pjesë e një plani më të gjerë të fondacionit, i cili synon të shpenzojë rreth 9 miliardë dollarë në vit.
Fondet do të përdoren për të mbështetur partnerë që punojnë në fusha si arsimi, shëndetësia dhe bujqësia. Një tjetër synim është krijimi i bazave të të dhënave të nevojshme për zhvillimin e IA-së, përfshirë mundësinë që modelet e mëdha gjuhësore të funksionojnë në të gjitha gjuhët që fliten në botë.
“Në sektorin e shëndetësisë, është e vështirë të mbivlerësohet madhësia e mundësive”, tha Gates, duke iu referuar përdorimit të IA-së për të mbështetur punonjësit e kujdesit shëndetësor, si dhe për zbulimin e barnave dhe vaksinave të reja.
“IA është si një inteligjencë aliene”
Gates paralajmëroi se qeveritë duhet të bashkëpunojnë për të shmangur probleme serioze që mund të shfaqen me zhvillimin e mëtejshëm të Inteligjencës Artificiale.
Duke përdorur një krahasim me filmat fantastiko-shkencorë, ai e përshkroi IA-në si një formë të re inteligjence që tashmë është mes nesh dhe që kërkon një reagim të përbashkët nga shtetet.
“IA është në një farë mënyre si kjo inteligjencë aliene. Ata janë këtu dhe ne më mirë të bëjmë atë që i shohim të bëjnë në këto filma”, u shpreh ai.
Çështja Epstein dhe reputacioni i Gates
Në qershor, Gates dëshmoi para Kongresit lidhur me marrëdhënien e tij me Jeffrey Epstein, i dënuar për krime seksuale dhe tashmë i ndjerë.
Gates nuk është akuzuar për ndonjë krim dhe ka deklaruar vazhdimisht se i vjen keq për marrëdhënien me Epstein. Sipas tij, ai kishte shpresuar se Epstein mund të siguronte donacione për kauza globale në fushën e shëndetësisë.
Gates ka deklaruar gjithashtu se Epstein u përpoq ta shantazhonte duke përdorur informacione lidhur me marrëdhëniet e tij jashtëmartesore.
Çështja bëri që Fondacioni Gates të kërkonte një auditim të jashtëm. Sipas materialit, hetimi nuk gjeti pagesa për Epstein apo përfshirje në aktivitete kriminale.
Gates tha se, pavarësisht zbulimeve, marrëdhënia me Epstein nuk i ka shkaktuar dëme të konsiderueshme as reputacionit të tij dhe as atij të fondacionit.
“Sa i përket aksesit tim tek udhëheqësit e qeverisë ose gatishmërisë së gazetarëve për të më intervistuar, nuk shoh ndonjë rënie”, deklaroi ai, duke shtuar se interesi për ekspertizën e Fondacionit Gates në uljen e vdekjeve të fëmijëve dhe eliminimin e malaries nuk është zvogëluar “aspak”.