Presidenti amerikan Donald Trump ka dalë kundër kërkesave për një kontroll më të fortë të inteligjencës artificiale, duke theksuar se Shtetet e Bashkuara duhet të mbajnë epërsinë ndaj Kinës në zhvillimin e kësaj teknologjie. Në disa postime dhe deklarata publike, Trump i ka minimizuar shqetësimet lidhur me rreziqet e IA-së, duke argumentuar se mbikëqyrja e tij është e mjaftueshme për të shmangur skenarë të rrezikshëm.
Trump e ka cilësuar debatin mbi rreziqet e inteligjencës artificiale si një “mashtrim”, duke e vendosur atë në të njëjtën linjë me shqetësimet për ndryshimet klimatike dhe hetimet mbi lidhjet e fushatës së tij me Rusinë. Ai ka mbrojtur gjithashtu zgjerimin e qendrave të të dhënave, pavarësisht kundërshtimeve që janë shfaqur në disa komunitete për zhvillimin e shpejtë të infrastrukturës së nevojshme për teknologjinë e IA-së.
“E vetmja kontroll ose ‘valvul sigurie’ që i duhet IA-së është një president i fortë dhe inteligjent”, shkroi Trump në Truth Social. Ai shtoi se qeveria amerikane tashmë ka një nivel të konsiderueshëm autoriteti rregullator mbi kompanitë e teknologjisë.
Gjashtë postime brenda një dite
Qëndrimi i Trump u bë veçanërisht i qartë të hënën, kur presidenti publikoi gjashtë postime që kishin në qendër inteligjencën artificiale. Po atë ditë, ai zhvilloi edhe një bisedë telefonike me Jensen Huang, drejtuesin ekzekutiv të Nvidia-s, i cili ndodhej në një konferencë në Los Angeles.
Gjatë telefonatës, Trump tha se nuk beson se IA-ja apo robotët mund të marrin kontrollin e botës.
“Robotët nuk do të pushtojnë. IA nuk do të pushtojë pjesën tjetër të botës. E gjithë kjo është një mashtrim”, deklaroi ai.
Presidenti amerikan ka thënë më herët se e përdor vetë inteligjencën artificiale. Sipas këshilltarëve të tij, përdorimi i teknologjisë nga Trump lidhet kryesisht me krijimin e imazheve që përdoren në postimet e tij në rrjetet sociale.
Vance: IA-ja ka rreziqe, por rregullat mund të favorizojnë kompanitë e mëdha
Edhe zëvendëspresidenti J.D. Vance ka shfaqur skepticizëm ndaj kërkesave për një kuadër më të ashpër rregullator. Ai ka paralajmëruar se një paketë e re rregullash mund të shndërrohet në një “Kali të Trojës”, duke u dhënë avantazh kompanive më të mëdha, të cilat kanë kapacitetet financiare dhe teknike për të përballuar kostot e rregullimeve.
Megjithatë, Vance ka pranuar se inteligjenca artificiale mund të sjellë rreziqe dhe pasoja negative. Sipas tij, Shtëpia e Bardhë dhe Kongresi duhet të bashkëpunojnë për të përcaktuar masat e duhura që do të ofrojnë mbrojtje pa penguar zhvillimin e teknologjisë.
Qasja e administratës Trump ka krijuar përplasje me disa drejtues të industrisë, të cilët kërkojnë masa më të forta sigurie. Në mesin e tyre është edhe Dario Amodei, drejtori ekzekutiv i Anthropic, i cili ka mbështetur vendosjen e kontrolleve më të rrepta për të kufizuar rreziqet që mund të sjellë teknologjia.
Trump e konsideron IA-në një “patë të artë”
Për Trump, inteligjenca artificiale nuk është vetëm një çështje teknologjike, por edhe një faktor me rëndësi të madhe për ekonominë amerikane. Zgjerimi i këtij sektori ka sjellë investime të konsiderueshme në qendra të të dhënave dhe ka ndikuar në rritjen e kompanive të teknologjisë dhe tregjeve financiare.
Presidenti amerikan e ka përshkruar inteligjencën artificiale si një “patë të artë” për ekonominë e SHBA-së. Sipas tij, vendosja e shumë kufizimeve mund të ngadalësojë zhvillimin amerikan dhe t’i krijojë Kinës mundësinë për të ngushtuar diferencën.
Në të njëjtën kohë, shqetësimet për zhdukjen e vendeve të punës, ndikimin e qendrave të të dhënave te komunitetet lokale dhe rreziqet e sigurisë po shtojnë kërkesat për masa mbrojtëse.
Kongresi pritet të përfshihet në debatin për rregullat e reja
Çështja pritet të marrë një rëndësi edhe më të madhe në Kongresin amerikan. Kryetari i Dhomës së Përfaqësuesve, Mike Johnson, ka thënë se dëshiron të organizojë një takim ku të marrin pjesë Trump, ligjvënës dhe drejtues të industrisë së inteligjencës artificiale, me qëllim diskutimin e hapave të ardhshëm.
Johnson ka paralajmëruar se Kongresi duhet të shmangë miratimin e nxituar të rregullave tepër të ashpra, pasi burokracia e tepruar mund të dëmtojë avantazhin teknologjik të Shteteve të Bashkuara ndaj Kinës.
Në të njëjtën linjë, udhëheqësi i shumicës në Senat, John Thune, ka mbështetur vendosjen e masave mbrojtëse, por ka kërkuar që ato të hartohen me kujdes dhe të mos kthehen në kufizime të tepërta.
Ndërkohë, inteligjenca artificiale pritet të jetë një nga temat kryesore në marrëdhëniet mes SHBA-së dhe Kinës. Uashingtoni po përgatitet për bisedime me Pekinin, ndërsa dy fuqitë botërore vazhdojnë garën për epërsi në një teknologji që po merr një rol gjithnjë e më të madh në ekonomi, siguri dhe kapacitete ushtarake.
Trump dhe presidenti kinez Xi Jinping kanë diskutuar më herët për masat e sigurisë që lidhen me inteligjencën artificiale. Ndërkohë, Kina ka sinjalizuar gatishmërinë për të zhvilluar një dialog ndërqeveritar me Shtetet e Bashkuara për këtë çështje.