37 pakot me kokainë të sekuestruara një ditë më parë, më 14 shtator, në Portin e Durrësit, në pjesën e jashtme të një kontejneri frigoriferik që transportonte mish pule, dyshohet se kanë lidhje me grupin e Gerd Gjinararit, i njohur me nofkën “Gjenerali”, i arrestuar pak muaj më parë në Belgjikë. Lidhja e mundshme mes ngarkesës së kapur në Shqipëri dhe grupit kriminal është bërë e ditur nga autoritetet belge, të cilat po në të njëjtën ditë njoftuan goditjen e një grupi shqiptar të përfshirë në trafikun e kokainës.
Në Shqipëri, 37 pakot me kokainë të zbuluara të hënën në kontejnerin që transportonte mish pule nga Brazili, fillimisht mbetën pa një destinacion të përcaktuar dhe pa të dhëna konkrete mbi personat që qëndrojnë pas ngarkesës.
Megjithatë, pikërisht në ditën kur droga u zbulua në Portin e Durrësit, autoritetet belge njoftuan goditjen e një grupi shqiptar të përfshirë në trafikun e kokainës në Antwerp. Operacioni ishte rezultat i një hetimi të përbashkët me disa vende dhe bashkëpunimit me Europolin, hetim që kishte çuar edhe në sekuestrimin e drogës në Shqipëri.
Lidhjen mes dy ngjarjeve e konfirmon zëdhënësi i Prokurorisë së Antwerp-it, Kristof Aerts.
“Si pjesë e hetimit, u zhvillua një bashkëpunim i ngushtë me vendet e tjera dhe me Europolin. Kjo mund të rezultojë në arrestime jashtë vendit. Pas ndërhyrjes, një ngarkesë prej 37 kilogramësh kokainë u sekuestrua në Shqipëri, në një kontejner frigoriferik”, deklaroi Kristof Aerts.
Burime për mediat bëjnë me dije se çështja i është referuar SPAK-ut, i cili pritet të marrë në vijim hetimin e plotë. Sipas të dhënave të deritanishme, kokaina ishte nisur nga Brazili dhe kishte kaluar më herët tranzit përmes Greqisë.
Në Antwerp, grupi i narkotrafikantëve të goditur nga autoritetet belge rezulton të ketë lidhje me një personazh të njohur të botës së krimit në Shqipëri, Gerd Gjinararin, i arrestuar në Belgjikë në muajin qershor.
Tetë persona pjesë e grupit përfunduan në pranga. Mes tyre ndodhet edhe një 48-vjeçar shqiptar, i dyshuar si ndërmjetës mes grupeve kriminale në Shqipëri dhe atyre në Amerikën Latine. Sipas hetuesve belgë, ai siguronte lidhjet për importimin e sasive të mëdha të kokainës përmes portit të Antwerp-it dhe kishte kontakte edhe me grupe të trafikut të drogës në vende të ndryshme të Europës, deri në Australi.
Identiteti i tij ende nuk është bërë publik, por ai rezulton të ketë qenë në kontakt me Gerd Gjinararin, një personazh me një të kaluar të gjatë kriminale.
Gjinarari ishte vetëm 23 vjeç kur, në vitin 1997, vrau Naim Zyberin në një spital në Milano. Për këtë dhe vepra të tjera penale, ai u dënua me burgim të përjetshëm nga Gjykata e Krimeve të Rënda e Milanos, vendim që mori formë të prerë në vitin 2001.
Në vitin 2014, Gjinarari u transferua në Shqipëri për të vijuar vuajtjen e dënimit. Në shkurt të vitit 2019, ai u lirua me kusht nga gjyqtari Markelian Kuqo në Korçë, vetëm pak kohë pasi ishte transferuar në burgun e Drenovës.
Pak javë më vonë, Apeli vendosi rikthimin e tij në qeli, por deri atëherë Gjinarari ishte arratisur.